Wiukomme bir Vorstellig vor Schwizer Gilde <Equinox>
Da die Gildenvorstellung ausschliesslich auf Schweizer Spieler abzielt, wird die Vorstellung standesgemäss auch auf Schweizerdeutsch abgehalten. I däm Sinn, merci viu mau fürs Ineluege und viu Spass bim läse!
Was Equinox isch:
Equinox (Fachbegriff für dTag-und-Nacht-Gliichi) isch e Zämeschluss us bis jitz 40 Schwizerische Spiler ufem Server Alustin mitem Ziel, im Verlouf vo BDO im Burgechrieg, GVG, PVP und natürlech ou im PVE-Content mitzmische. Mir si es momentan bunt zämegwürflets Mischmasch us aune Bildigs- und Autersebene, wobi 18 als ungersti Gränze definiert isch. Was üs alli verbingt: Ändlech chöi mir im Gildechat und im TS-Server ungezwunge Dialäkt schribe / rede, ohni ufs stiife, gezwunge würkende Schriftdütsch uszwiche müesse, dermit üs üsi Gildemitglieder verstöh. Üsi Gildemitglieder stöh mit Rat und Tat zur Hilf, faus sech Frage zum Gameplay oder süsch Content ergäbe und dämentsprächend wird dr Gildechat ou rege genutzt. Gselligkeit ghört also durchus ou zu üsne Sterchine. Ou Gildemissione wärde gmacht, vorzüglech gäge speetere Namittag, resp. Abe. Di meiste vo üsne Mitglieder stöh nit nume in Balenos, Serendia und Calpheon sondern ou fest im Läbe. Ds bedütet, dass zwar zu aune Zyte Lüt da si, aber deswäge konzentriert sech di grössti Onlineaktivität täglech zwüsche 17:00-23:00 und vor allem am Wuchenend.
Das leitet mi zum Nächste: I üsere Gilde gits kei Mindest-Aweseheitspflicht. Mir si dr Meinig, dass imne MMO dr Spass söu im Vordergrund stah und nit dür Zwang (egau welere Art) ds Spiuerläbnis söu iigschränkt wärde. Deswäge gits bi Equinox ke TS-Pflicht, Aweseheitspflicht oder Pflicht zum Mitmache bi Gildemissione. Es isch klar, dass es natürlech gärn gseh wird, wenn dLüt mithäufe und sech aktiv beteilige (und nur so chame natürlech i "Core", resp. i höcher Teil vor Gilde cho), aber es wird niemer derzue zwunge und ersch recht nit usegworfe, nur will er jitz momentan Prüefige het, wett grinde, oder es Date het am SA-Abe.
Wini obe bereits churz erwähnt ha, lige dZiel vo Equinox vor auem im Burgechrieg im Endgame. Mir wette e durchus ernstznehmendi (so ernstzne, wis mitemne Mindestmass a elitäre, hierarchische Strukture und Füehrigsstil halt geit) Gilde wärde, wo im Kampf um Pünkt zmingst es Wörtli cha mitrede. Daderzue wird dMitgliederzahl vo momentan 40 sicher no es bitz stiige. Natürlech wöi mir ou jedwede PVE-Content nutze und ou GVG & PVP mache / Gildemissione mache. Sprich, mir wöi dr vo Pearl Abyss zur Verfüegig gstellt Content so guet wi müglech usnütze.
Mir verfüege über ne TS3-Server, aber entsprächend üsem Mindset ischs ke Pflicht, nonstop und unungerbroche im TS z'sy. Ou für Gildemissione isch bis anhin ke TS-Pflicht planet, solangs um (längwiligi... ;-) ) Sammelmissione geit. Sobauds aber es bitzli meh Kommunikation erfordert, z.B. bi Besatzige oder de bi GVG, wärs de sicher ou schön, weme ni aues muess i Gildechat schribe.
Da mir e Mediamatikerin ir Gilde hei, hei mir ou e Website im Wordpress, im Stil vomne Blog. Gern darfsch die Website mau bsueche und Dir säuber e Idruck vo Equinox bilde. DWebsite isch noni ultra-gfüllt mit Content, aber e bitz öppis isch doch scho da. (https://bdoequinox.wordpress.com/)
Was Du söttsch si / ha:
- Schwizer / Schwizerin
- 18 + (Obergränze besteit nit, mir hei ou scho Eltere und altiigsässnigi MMO-Spieler)
- Ufem Server Alustin
- Fründleche Umgang mit Mitspieler, insbesondere Gildemitglieder
- Grundsätzlechi Bereitschaft, de angere Gildemitglieder z'häufe
- Grundsätzlechi Bereitschaft, a Gildemissione & custom Events ( so z.B. letztens Gildefoti) teilznä
- Grundsätzlechi Bereitschaft, im speetere GVG / Guildcontent ou mal is TS z cho (isch eh viu meh fun!)
- Verständnis, faus mau wäge RL-Abwäseheite ke Content cha stattfinde
- Eigeninitiative im Sinn, ou Vorschleg für Events etc. z mache
Was Dir Equinox cha biete:
- E aktivi Schwizer Gmeinschaft, wo Du ungezwunge Dialäkt chasch schribe / rede
- Fründlechi, gselligi Spiustunde
- Müglechkeit, mit angerne PVE, PVP & GVG-Content z nutze
- Ufstiegs- und Entfaltigsmüglechkeite gildenintern
- Servermässigs Mitmische im Endcontent (hoffentlech zmingst)
- TS3-Server
- Gildewebsite
- Und noch viel mehr.
Mir hoffe, Dis Inträsse für Equinox gweckt z'ha. Gern darfsch hie i däm Thread antworte, uf üsere Gildewebsite e Post hingerla oder ingame (Gildeleader Tarra Sunborn) schribe, faus sech Frage ergäbe. Natürlech würde mir üs über nes paar wort zu dir selber fröie, falls Inträsse hesch, Equinox biizträte.
I däm Sinn, merci viu viu mau fürs Düreläse und frohs game!